पूर्वमा सवारी दुर्घटना बढ्दो, दुई दिनमा १३ जनाको मृत्यु

सुब्रत न्यौपाने
झापा २ माघ
पूर्वमा दुई दिनयता भएका सवारी दुर्घटनामा १३ जनाको मृत्यु भएको छ । शुक्रबार र शनिबार भएका सवारी दुर्घटनामा उनीहरुको ज्यान गएको हो । शनिबार मोरङमा पाँचजना झापामा दुईजना र सप्तरीमा एकजनाको मृत्यु भएको छ । मोरङको डाँगीहाटस्थित लक्ष्मी मार्गमा शनिबार मध्यान्ह भएको दुर्घटनामा झापाका दुई युवकले ज्यान गुमाएका छन् । मयुर कला केन्द्रका कलाकर्मीद्वय नवराज सिटौला र सागर अधिकारीको मृत्यु भएको हो । मे १ प ६८१८ नम्बरको मोटरसाइकलमा सवार उनीहरुको उपचारका लागि धरान लैजाँदै गर्दा बाटैमा मृत्यु भएको इलाका प्रहरी कार्यालय बेलबारीले जनाएको छ । तीव्र गतिका कारण अनियन्त्रित भई उनीहरु सवार सो मोटरसाइकल सडक किनारको खम्बामा ठोकिएको प्रहरी निरीक्षक दिलबहादुर सुवेदीले बताए । यसअघि शुक्रबार राति मोरङको बेलबारीमा को १ ख १०१३ नम्बरको बस पल्टिँदा घाइते भएकामध्ये दुईजनाको शनिबार मृत्यु भएको छ । विराटनगरस्थित न्युरो अस्पतालमा उपचारका क्रममा मोरङ बनिगामा-१ का मनोज भगत र गोपाल परियारको मृत्यु भएको पूर्व क्षेत्रीय प्रहरी कार्यालय विराटनगरले जनाएको छ । सो दुर्घटनामा बनिगामा-५ का ३५ वर्षीय नेमनारायण चौधरीको घटनास्थलमै मृत्यु भएको थियो । दुर्घटनामा ४० जना घाइते भएका थिए । घाइतेमध्ये छजनाको अवस्था चिन्ताजनक छ । दुर्घटनामा गम्भीर घाइते हुनेमा बनिगामा-१ का पुरन्दर साह बनिगामा-५ का शिवनारायण चौधरी मोरङ रामपुर-९ की सिरु चौधरी लगायत छन् । शनिबार झापाको सतासीधाम-१ स्थित डुँडामारीमा बा ३ प ८८७३ नम्बरको मोटरसाइकल दुर्घटना हुँदा मोरङ केरौनकी तारा कटुवालको मृत्यु भएको इलाका प्रहरी कार्यालय झिलझिलेले जनाएको छ । घटनामा मोटरसाइकल चालक झापा शिवगाज-९ का अनन्त राजवंशी गम्भीर घाइते भएका छन् । यसअघि शुक्रबार झापाको तोपगाछीमा भएको दुर्घटनामा चारजनाले ज्यान गुमाएका थिए यसैगरी झापाको सुरुङ्गा खण्डमा शनिबार दिउँसो कार पल्टँदा चालकको ज्यान गएको छ । दुर्घटनामा कार चालक भारतीय नागरिक बालकृष्ण दाहालको मृत्यु भएको इलाका प्रहरी कार्यालय विर्तामोडले जनाएको छ । झापाको माईधारमा लागेको माघे मेलाबाट फर्किदै गरेका दुईवटा मोटरसाइकललाई ठक्कर दिएर भाग्ने क्रममा सो कार पल्टिएको हो । त्यस्तै सप्तरीको कडोरवनामा नाम नखुलेको सवारीसाधनको ठक्करबाट भारत लुदियानाका मोहमद सिकन्दरको मृत्यु भएको छ । उपचारका क्रममा सगरमाथा अाचल अस्पताल राजविराजमा उनको मृत्यु भएको प्रहरीले जनाएको छ । यसैगरी शनिवार साँझ मोरङको दादरबैरिया- ९ मा बसको ठक्करले एकजनाको ज्यान गएको छ । रङ्गेलीबाट विराटनगरतर्फ आउँदै गरेको को १ ख ५७ नम्बरको बसको ठक्करबाट स्थानीय राधेश्याम राय यादव मृत्यु भएको प्रहरीले जनाएको छ । ४५ वर्षीय यादवलाई बसले ठक्कर दिएपछि उपचारका लागि कोसी अाचल अस्पताल विराटनगर ल्याइएको थियो । उनको उपचारको क्रममा मृत्यु भएको हो ।