दुर्घटनामा चारको मृत्यु

झापा १ माघ
झापाको तोपगाछी-७ स्थित सानोकेर्खामा शुक्रबार बिहान भएको सवारी दुर्घटनामा एक बालकसहित चारजनाको मृत्यु भएको छ । घटनामा पाँच जना घाइते भएका छन् । मृत्यु हुनेमा उदयपुरका ३८ वर्षीय सूर्यबहादुर राय तेह्रथुमका महेन्द्र लिम्वु र उनकी श्रीमती धनकुमारी छन् । दुर्घटनामा विराटनगर घर भएकी कुमारी तामाङका डेढ वर्षीय छोरा सागरको पनि मृत्यु भएको इलाका प्रहरी कार्यालय दमकले जनाएको छ । विराटनगरबाट झापा आउँदै गरेको बा।५ च ६५४३ नम्बरको मारुती भ्यान र विपरीत दिशाबाट गइरहेको ना।३ ख ९९९४ नम्बरको बस एकआपसमा ठोक्किँदा सो दुर्घटना भएको हो । दुर्घटनामा मृत्यु भएका राय भ्यान चालक हुन् । उनको घटनास्थलमै मृत्यु भएको थियो भने डेढ वर्षीय बालक तामाङ्को विर्तामोडस्थित काचनजङ्घा अस्पतालमा उपचारका क्रममा मृत्यु भएको हो । मृतक सबै झापाको सतासीधामस्थित कन्काइ माइमा मकर नुहाउन आउँदै गर्दा दुर्घटनामा परेको प्रहरी निरीक्षक नवीन कार्कीले बताए । दुर्घटनामा गम्भीर घाइते भएकी विराटनगर- १६ की हेमकुमारी लिम्बु उनकी १२ वर्षीया छोरी झरना १४ बर्षीया सिवानी तामाङ छ बर्षिया आरती लिम्बु र पहिचान नखुलेकी एक महिलाको विराटनगरस्थित न्युरो आस्पतालमा उपचार भइरहेको छ । घटनामा घाइते विराटनगर- १६ की कुमारी तामाङको विर्तामोडस्थित काचनजङ्घा अस्पतालमा उपचार भइरहेको प्रहरीले जनाएको छ । यसैबीच मोरङको सुन्दरपुरमा ट्रकले बसलाई ठक्कर दिँदा पाँचजना घाइते भएका छन् । पूर्व आउँदै गरेको ट्रक र पश्चिम जाँदै गरेको बस जुधेपछि सवारी रोकेर चालकहरु विवाद गर्न थालेकाले सडकमा रोकी राखेको बसलाई पुर्वबाट आएको अर्को ट्रकले ठक्कर दिँदा बसका यात्रु घाइते भएको प्रहरीले जनाएको छ । यस्र्तै धनकुटाको तांखुवा-९ फलैँचास्थित सिँधुवाबाट हिलेतर्फ आइरहेको को २ प ३४७८ नम्वरको।मोटरसाइकल विहीवारराती दुर्घटना हुँदा दुई जना घाइते भएका छन् । घाइतेको वी पी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।