झापामा एकलाख ८० हजार घर

झापा २५ जेठ   राष्ट्रिय जनगणना २०६८ अन्तर्गत पहिलो चरणको सूचीकरणले झापा जिल्लामा एक लाख ८० हजार घर परिवार रहेको प्रारम्भिक तथ्याङ्क सार्वजनिक भएको छ ।
पहिलो चरणको सूचीकरणका लागि निम्न माध्यमिक शिक्षक शिक्षिका तथा नायव सुब्बास्तरका कर्मचारी गरी दुई सय गणना सुपरीवेक्षकले प्रारम्भिक तथ्याङ्क सङ्कलन गरेका थिए । नमुना सुपरीवेक्षणका लागि भद्रपुर नगरपालिका तथा चन्द्रगढी र धाइजन गाउँ विकास समितिमा महिला मात्र गणना सुपरीवेक्षक परिचालन गरिएको जिल्ला जनगणना कार्यालयले जनाएको छ ।
यस्तै पहिलो चरणको सुपरीवेक्षण ३२ प्रतिशत आदिवासी जनजाति ३१ प्रतिशत महिला तथा कार्यरत सबै मधेशी निमावि शिक्षक समेत रहेको जनगणना अधिकृत कपिलप्रसाद तिमल्सेनाले बताए । 
पहिलो चरणमा प्रत्येक घरपरिवारलाई ३० वटा प्रश्न सोधी जनसाङ्ख्यिक पुरुष महिला तेस्रो लिङ्गी कृषि कार्य तथा साना घरेलु व्यवसायअन्तर्गत पर्ने विवरण सङ्कलन गरिएको छ । पहिलो चरणको प्राप्त आँकडाका आधारमा दोस्रो चरण ०६८ असार ३ देखि १३ गतेसम्म सबै घरपरिवारको पारिवारिक विवरण नाम थर उमेर लिङ्ग धर्म जातजाति भाषा साक्षरता अपाङ्गता वैवाहिक स्थिति तथा उमेर समूहका हरेक व्यक्तिको आर्थिक कि्रयाकलाप सम्बन्धी विवरण समेत सङ्कलन गर्ने लक्ष्यका साथ ५० प्रश्न सोधी तथ्याङ्क लिइने अधिकृत तिमल्सेनाले बताए ।
पहिलो चरणको प्रारम्भिक सूचीकरणमा जिल्लाका सबै वर्ग समुदाय राजनीतिक दल नागरिक समाज एवम् साचार माध्यम समेतबाट पूर्ण सहयोग पाएकाले अपेक्षा गरिएभन्दा सहज रुपले सम्पन्न भएको गणना अधिकृतको भनाइ छ ।